गुल्मी, पुष २ । नेपाली काँग्रेस गुल्मीको जिल्ला पार्टी कार्यायल विगत एक हप्तादेखि अन्धाकारमा छ । सो पार्टीले विद्युत प्राधिकरण गुल्मी वितरण केन्द्रलाई विद्युत महशुल नबुझाएपछि एक हप्ता अघि लाइन काटिएको हो । सो पार्टी कार्यालयसँगै नेपाल कम्युनिष्ट पार्टी (नेकपा) को पार्टी कार्यालयमा पनि लाइन काटिएको रातोपाटी डट कमले खबर छापेको छ । तर सो पार्टीले लाईन काटिएलगत्तै विद्युत महशुल बुझाएपछि जोडिएको विद्युत प्राधिकरण गुल्मी वितरण केन्द्रले जनाएको छ ।
नेपाल कम्युनिष्ट पार्टी (नेकपा) ले २२ हजार ४ सय १९ रुपैयाँ महसुल बुझाएपछि लाइन जडान गरिएको छ भने नेपाली कांग्रेसले ५४ हजार ३ सय ३६ रुपैयाँ बुझाउनु पर्नेमध्ये केही रकम बुझाए पनि पुरा रकम नबुझाएका कारण लाइन जडान गर्न नसकिएको सो कार्यालयका आय प्रमुख विकास पन्थीले जानकारी दिए । पार्टी कार्यालयमात्र होइन सरकारी कार्यालयका पनि १५÷१६ स्थानमा लाइन काटिएको पन्थीले बताए । गाउँपालिकामध्ये मदाने गाउँपालिकाका अन्तर्गतका विभिन्न कार्यालयहरुको पनि काटिएको तर उनीहरुले पैसा बुझाएपछि जडान गरिएको पन्थीको भनाइ छ ।
पछिल्लो चरण विद्युत चुहावट गर्ने र विद्युत महशुल नतिर्ने जो कोहीविरुद्ध कडा रुपमा प्रस्तुत हुने प्राधिकरण गुल्मी वितरण केन्द्रका प्रमुख नारायण अर्यालले बताए । उनका अनुसार पछिल्लो चरण ७१ वटा ग्राहकको लाईन काटिएको छ । उनीहरु बाट २५ प्रतिशत जरिवाना बाहेक २२ लाख ७ हजार ९ सय ९० रुपैया विद्युत महशुल अशुल गरिने छ । क्षेत्र नम्वर २ तर्फ करिव ६० वटा स्थानमा पनि लाइन काट्न टोली तत्काल खटाउन लागिएको कार्यालय प्रमुख अर्यालले बताए ।
